
410རྒྱལ་དབང་བློ་བཟང་རིན་ཆེན་ཚངས་དབྱངས་རྒྱ་མཚོས་འཇམ་དབྱངས་བཞད་པའི་རྡོ་རྗེར་དྲི་བ་གནང་བའི་བཀའ་ལན་ཙནྟ་མ་ཎིའི་ཕྲེང་བ་ཞེས་བྱ་བ་བཞུགས་སོ།།
47-6-176
༄༅། །རྒྱལ་དབང་བློ་བཟང་རིན་ཆེན་ཚངས་དབྱངས་རྒྱ་མཚོས་འཇམ་དབྱངས་བཞད་པའི་རྡོ་རྗེར་དྲི་བ་གནང་བའི་བཀའ་ལན་ཙནྟ་མ་ཎིའི་ཕྲེང་བ་ཞེས་བྱ་བ་བཞུགས་སོ།།
༄། །ཕྱི་ནང་གི་མཁའ་སྤྱོད་དང་། དྲང་ངེས་ཀྱི་ཁྱད་སྤྱོད།
༄༅། །རྒྱལ་དབང་བློ་བཟང་རིན་ཆེན་ཚངས་དབྱངས་རྒྱ་མཚོས་འཇམ་དབྱངས་བཞད་པའི་རྡོ་རྗེར་དྲི་བ་གནང་བའི་བཀའ་ལན་ཙནྟ་མ་ཎིའི་ཕྲེང་བ་ཞེས་བྱ་བ་བཞུགས་སོ།།ཀ༽ ཕྱི་ནང་གི་མཁའ་སྤྱོད་དང་། དྲང་ངེས་ཀྱི་ཁྱད་སྤྱོད།(༡བ)ན་མཿསྭ་ར་སྭསྟྱཻ།མཐོང་བས་དོན་ལྡན་སྤྱན་རས་གཟིགས་དབང་གི །ཞབས་ཀྱི་པདྨོར་སྤྱི་བོས་ཉེར་བཏུད་ནས། །བཀའ་སྩལ་ཕེབས་ལན་ཙིནྟ་མ་ཎིའི་འཕྲེང་། །དད་པས་སོར་བཅུའི་ཐལ་མོ་སྦྱར་ནས་འབུལ། །དེ་ལ་སྤྱིར་སྔགས་ནས་བཤད་པའི་མཁའ་སྤྱོད་ཅེས་པ་ལ་ཕྱི་ནང་གི་མཁའ་སྤྱོད་གཉིས་ཡོད་ལ། ནང་གི་མཁའ་སྤྱོད་ནི་ལྭ་བ་པ་སོགས་ཀྱི་འགྲེལ་པ་ལས་བཤད་ཚུལ། བསྐྱེད་རིམ་འདོད་འཇོ་ལས། འགྲེལ་པ་གསུམ་ནས་མཁའ་སྤྱོད་འོད་གསལ་ལ་བྱས། འོད་གསལ་གྱི་གོ་འཕང་ལ་འགོད་པར་བཤད་པ་ནི་ངེས་དོན་གྱི་བཤད་པ་ཡིན་ཏེ། ཞེས་གསུངས་ལ། འདིས་གཞི་ལམ་གྱི་ནང་གི་མཁའ་སྤྱོད་གཉིས་བསྟན་ཏོ། །ཕྱིའི་མཁའ་སྤྱོད་ནི། གཉིས་ཀའི་སྦྱར་བཤད་ལས། (༢ན)ཁྱད་པར་དུ་འཕགས་པའི་
47-6-177
གནས་རྣམས་ཞེས་དང་། བསྐྱེད་རིམ་འདོད་འཇོ་ལས། སྒྲས་ཟིན་ཚོད་ཀྱི་སྟེང་ནས་བཤད་པ་ནི་དྲང་དོན་གྱི་མཁའ་སྤྱོད་དོ། །ཞེས་གསུངས་པས་བསྟན་ལ། དེ་ཡང་ཕྱིའི་མཁའ་སྤྱོད་ལ་གནས་ཀྱི་སྒོ་ནས་ཉེར་བཞི་ཡོད་དེ། འཛམ་བུའི་གླིང་གི་པུ་ལླིར་མ་ལ་ཡ་སོགས་གནས་ཉེར་བཞིའི་ནམ་མཁའ་ལ་དཔའ་བོ་ཉེར་བཞི་ལ་འཁོར་འབུམ་སྡེས་བསྐོར་བའི་གཞལ་ཡས་ཁང་ཉེར་བཞི་སོགས་ཡོད་ཅིང་། དེ་རེ་རེའང་ཕྱི་ནང་གཉིས་ཀར་སྦྱོར་བའི་ཕྱིར་ཏེ། བདེ་མཆོག་རྩ་རྒྱུད་ལས།བུ་ལི་སོགས་པ་གང་བསྟན་པ། །ཕྱི་ནང་བདག་ཉིད་ཅན་དུ་གནས། །མཐོ་རིས་ས་སྟེང་ས་འོག་ཏུ། །དཔའ་བོའི་ཡན་ལག་བརྟན་གཡོའི་བདག །ཅེས་དང་། ཀུན་མཁྱེན་ལྷ་རི་(༢བ)བ་ཡོན་ཏན་རྒྱ་མཚོའི་བདེ་མཆོག་གི་བསྐྱེད་རིམ་ལས། སྔོན་བྱུང་ལ་དྲག་པོས་ཡུལ་ཉེར་བཞིར་རང་གི་ལུས་ཀྱི་ཆ་ཉེར་བཞི་རྡོ་ལ་རང་བྱུང་གི་ཚུལ་དུ་བཀོད་ནས། དེ་ལ་ཁཎྜ་ཀཱ་པ་ལ་སོགས་ཀྱིས་མཆོད་པར་བྱེད་ལ། དེ་འདུལ་བའི་ཕྱིར་དུ་རྡོ་རྗེ་འཆང་གིས་རང་གི་ལུས་ཀྱི་ཆ་ཉེར་བཞི་དཔའ་བོ་དཔའ་མོར་སྤྲུལ་ནས་དེ་དག་ཏུ་བཀོད་པ། ཞེས་དང་། ནག་པོ་སྤྱོད་པས་ཀྱང་།གནས་གཞན་རབ་ཏུ་དབྱེ་བ་ཡིས། །ཞེས་གསུངས་པ་ལྟ་བུ་ཡིན་ཡང་། འདི་དག་གི་གནས་ནམ་མཁར་གནས་པས་མཁའ་སྤྱོད་ཟེར་ཀྱང་། བརྟེན་པ་ལྷའི་སྒོ་ནས་ཐུགས་འཁོར་བརྒྱད་མཁའ་སྤྱོད། གསུང་འཁོར་བརྒྱད་ས་སྤྱོད་དང་། སྐུ་འཁོར་བརྒྱད་ས་འོག་ནས་སྤྱོད་པ་སྟེ་གནས་གསུམ་གྱི་དཔའ་བོ་དཔའ་མོའང་ཟེར་བ་མི་འགལ་བ་དང་། རེ་རེ་ལ་འཁོར་འབུམ་འབུམ་ཡོད་པ་དང་། རྒྱ་གར་བོད་སོགས་ཡུལ་རེ་རེ་ལའང་གནས་ཉེར་བཞི་ཡང་བཤད་རྒྱུད་ལས་བཤད་དོ། །
47-6-178
དང་པོ་སོ་སོ་སྐྱེ་བོའི་མི་ལྟ་བུ་ཡང་མཁའ་སྤྱོད་དེར་སོང་ནས་གྲོལ་བ་སོགས་མང་།ནང་གི་མཁའ་སྤྱོད་དང་ནང་གི་འོད་གསལ་དོན་གཅིག་པས། སྣང་མཆེད་ཐོབ་གསུམ་འོད་གསལ་དང་བཞིའི་ནང་གི་འོད་གསལ་ནི་ནང་གི་མཁའ་སྤྱོད་ཡིན་ལ། དེ་གསུམ་གྱི་སྒྲ་དོན་མང་ཡང་ཕྱོགས་གཅིག་བཤད་ན། ནམ་མཁའ་དྲི་མ་མེད་པ་ལ་ཟླ་འོད་ཀྱིས་ཁྱབ་པ་ལྟ་བུའི་སྣང་བ་བཀོད་པས་རང་བཞིན་གྱིས་དངོས་པོ་མ་ལུས་པ་ལ་དམིགས་པས་ན་སྣང་བ་ཞེས་བྱ་སྟེ། སྤྱོད་བསྡུས་(༣ན)ལས། དེ་ལ་སྣང་བའི་མཚན་ཉིད། ཅེས་པ་ནས། མ་ལུས་པ་ཐམས་ཅད་ལ་དམིགས་པས་ན་སྣང་བ་སྟེ་ཞེས་དང་། ཡང་དེ་ཉིད་ལས། ཤེས་རབ་དང་སྟོང་པའི་ཡེ་ཤེས་ནི་ཟླ་བ་ལྟ་བུ་སྣང་བ་སྟོང་པ་ཉིད་ཙམ་མོ། །ཞེས་གསུངས་སོ། །ནམ་མཁའ་དྲི་མེད་ལ་ཉི་འོད་ཀྱིས་ཁྱབ་པ་ལྟ་བུའི་སྣང་བ་དམར་ལམ་ཤིན་ཏུ་གསལ་བས་ན་མཆེད་པ་དང་། དངོས་པོ་མ་ལུས་པར་དམིགས་པས་ན་སྣང་བ་སྟེ་མཆེད་པ་ཞེས་བྱ་སྟེ། སྤྱོད་བསྡུས་ལས། སྣང་བ་མཆེད་པ་འདིའི་མཚན་ཉིད་གང་ཞེ་ན། ཞེས་པ་ནས། རིམ་པ་གཉིས་པ་ཤིན་ཏུ་སྟོང་པའི་མཚན་ཉིད་ཅན། ཞེས་དང་། དེ་ཉིད་ལས། ཐབས་ཀྱི་ཡེ་ཤེས་ནི་ཉི་མ་ལྟ་བུ་ཤིན་ཏུ་སྟོང་པ་ཙམ་མོ། ཞེས་གསུངས་སོ། །ནམ་མཁའ་དྲི་མེད་ལ་མུན་པས་ཁྱབ་པ་ལྟ་བུའི་སྣང་བ་ནག་ལམ་པས་དངོས་པོ་ཐམས་ཅད་ལ་སེམས་ཕྲ་བས་དམིགས་པས་ན་སྣང་བ་ཉེར་ཐོབ་ཅེས་བྱ་སྟེ། སྤྱོད་བསྡུས་ལས།སྣང་བ་ཐོབ་པ་གང་ཞེ་ན། དེ་བཞིན་དུ་ནམ་མཁའི་མཚན་ཉིད་ཅེས་པ་ནས། སེམས་མེད་པ་མི་གཡོ་བ་སོགས་དང་། ཡང་དེ་ཉིད་ལས། སྣང་བ་ཉེར་ཐོབ་པའི་ཡེ་ཤེས་ནི་མཚམས་ཀྱི་མུན་པ་ལྟ་བུ་སྟོང་པ་ཆེན་པོའི་མཚན་ཉིད་ཡིན་ལ། ཞེས་གསུངས་སོ། །དེ་དག་རྒྱུད་ཀྱིའང་དགོངས་པ་ཡིན་ཏེ། ལུང་སྟོན་ལས།རང་རིག་ཙམ་གྱི་ཡེ་ཤེས་ནི། །དེ་བཞིན་སྣང་བ་ཐོབ་པ་ཅན། །
47-6-179
ནམ་མཁའ་འདྲ་བར་མཚན་ཉིད་མེད། །ཅེས་གསུངས་(༣བ)པས་སྣང་བ་མཆེད་ཐོབ་ནམ་མཁའ་དྲི་མ་མེད་པ་ལྟར་སྣང་བ་བཤད་ན། ལུང་སྟོན་ལས། འོན་ཀྱང་དེ་ལ་མཚན་ཉིད་དབྱེར་ཡོད་དེ། །བར་མཚམས་ཉིན་དང་མཚན་མོའི་བདག །སྣང་བ་དང་ནི་སྣང་བ་མཆེད། །སེམས་ནི་རྣམ་པ་གསུམ་དུ་བཤད། །ཅེས་པས་མིང་དང་མཚན་ཉིད་ལྷག་མ་དང་དཔེ་གསུམ་བཤད་པའི་ཕྱིར། ནམ་མཁའ་སློང་བྱེད་ཀྱི་རྐྱེན་གསུམ་དང་བྲལ་བ་ལྟ་བུའི་སྟོང་པ་གསལ་བའི་སྣང་བ་ཅན་ཡིན་པས་ན་འོད་གསལ་ཞེས་བྱ་སྟེ། སྤྱོད་བསྡུས་ལས། གཉིས་པ་ནི་སྣང་བ་སྟེ་ཟླ་བའི་འོད་ཟེར་ལྟ་བུའོ། །ཞེས་པ་ནས། དེ་ནས་མུན་པ་དང་བྲལ་བའི་སྐད་ཅིག་ལ་འོད་གསལ་བ་སྟེ། ཤིན་ཏུ་གསལ་བ་རྟག་ཏུ་སྣང་བའི་བདག་ཉིད་ཅན་དོན་དམ་པའི་བདེན་པའི་རང་གི་མཚན་ཉིད་ཡེ་ཤེས་ཀྱི་མིག་གི་མཐོང་ངོ་། །ཞེས་དང་། འདུས་པའི་རྒྱུད་ཕྱི་མ་ལས་ཀྱང་། སྨིག་རྒྱུ་འདྲ་བ་དང་པོ་སྟེ། ནས།སྤྲིན་མེད་ལྟ་བུ་ནི་རྟག་ཏུ་སྣང་བ་ལྔ་པའོ། །ཞེས་དང་། རྡོ་རྗེ་གུར་ལས་ཀྱང་། དང་པོ་སྤྲིན་གྱི་རྣམ་པའོ། །ནས། ལྔ་པ་རྟག་ཏུ་གསལ་བ་སྟེ། །སྤྲིན་མེད་ནམ་མཁའ་ལྟ་བུའོ། །ཞེས་དང་།དེ་བཞིན་དུ་ལྭ་བ་པ་དང་ནཱ་རོ་པ་ཞལ་ལུང་རྩ་འགྲེལ་གྲོལ་ཐིག་མི་ཐུབ་ཟླ་བ་སོགས་འདྲ་ལ།ཀུ་ཀུ་རི་པས། མཚན་མ་ལྔའམ་བརྒྱད་འབྱུང་ངོ་། །དེ་ནས་འོད་གསལ་གནས་པར་འགྱུར། །ཞེས་དང་། རྗེའི་གསལ་སྒྲོན་ལས། མཚན་མ་ལྔ་ནི་སྨིག་རྒྱུ་སོགས་ལྔ་ཡིན་ལ། བརྒྱད་ནི་ཟླ་ཉི་མུན་པ་བཞི་བསྣན་(༤ན)པའོ། །ཞེས་གསུངས་པ་ལྟར་སྟོང་པ་བཞིའི་སྣང་ཚུལ་མཐུན་པས་སྒྲ་དོན་ཡང་མཐུན་ལ། དུས་འཁོར་སྣང་ཚུལ་སོགས་ལ་ཅུང་ཟད་ཁྱད་པར་ཡོད།ལམ་དུས་ཀྱི་མཁའ་སྤྱོད་ནི་དབེན་གསུམ་གྱི་འོད་གསལ་ཞེས་པ་ལུས་དབེན་ངག་དབེན་སེམས་དབེན་གསུམ་གྱི་གནས་སྐབས་ཀྱི་འོད་གསལ་གསུམ་དང་། སྒྱུ་ལུས་ཀྱི་འོད་གསལ་དང་། ཟུང་འཇུག་གི་འོད་གསལ་ལྟ་བུ་ཡིན་ལ། རིམ་པ་བཞི་པའི་འོད་གསལ་དེ་ཐེག་ཆེན་གྱི་མཐོང་ལམ་དང་ཉོན་སྒྲིབ་སྐོར་དགུ་གཅིག་ཆར་སྤོང་བའི་དངོས་གཉེན་བར་
47-6-180
ཆད་མེད་ལམ་ཡིན་ཏེ། ཁྲིད་ཡིག་རྣམས་ལས་དེ་ལྟར་གསུངས་པ་དེ་ནི་སྤྱོད་བསྡུས་ལས་གསུངས། དེ་ལ་དང་པོར་འོད་གསལ་དང་ཐམས་ཅད་སྟོང་པ་དང་སངས་རྒྱས་ཀྱི་ཡེ་ཤེས་དང་རྡོ་རྗེའི་ཡེ་ཤེས་དང་ཞེས་པ་ནས། ཉོན་མོངས་པ་རྣམ་པར་དག་པ་དང་ལས་རྣམ་པར་དག་པ་དང་སོགས་གསུངས་སོ། །ཟུང་འཇུག་ལ་ཉེར་གཅིག་ཡོད་དེ། འཕགས་པའི་རིམ་ལྔ་ལས།འཁོར་བ་དང་ནི་མྱ་ངན་འདས། །རྟོག་པ་གཉིས་པོ་སྤངས་པའི་ཕྱིར། །གང་དུ་གཅིག་ནི་དངོས་གྱུར་པ། །དེ་ལ་ཟུང་དུ་འཇུག་ཅེས་བཤད། །ཅེས་པ་ནས།གཟུགས་ཅན་དང་ནི་གཟུགས་མེད་ཅེས། །རྟོག་པ་གཉིས་པོ་སྤངས་པའི་ཕྱིར། །གང་ཞིག་གིས་རྟོགས་རྣལ་འབྱོར་དབང་། །དེ་ནི་ཟུང་འཇུག་ཐོབ་པའོ། །ཞེས་གསུངས་པས་གསལ་བར་བཤད། ཟུང་འཇུག་གི་སྐད་དོད་ཡོ་ག་ན་དྭི་ཞེས་པའི་ཡོ་ག་ཟུང་དང་ན་དྭི་གཉིས་(༤བ)མིན་པ་སྟེ། ན་དགག་ཚིག་དྭི་གཉིས་ཡིན་པས། འཁོར་བ་དང་མྱང་འདས་ཟུང་ཡིན་ལ། འཁོར་འདས་ངོ་བོ་གཉིས་མ་ཡིན་པའི་ཕྱིར། རོ་གཅིག་པའི་རྟོག་པ་གཅིག་ཟུང་འཇུག་དང་པོ་འཁོར་འདས་ཟུང་འཇུག་ཡིན་པ་ནས། གཟུགས་ཅན་གཟུགས་མེད་ངོ་བོ་ཐ་དད་དུ་འཛིན་པའི་རྟོག་པ་སྤངས་ནས་གཟུགས་ཅན་གཟུགས་མེད་རོ་གཅིག་ཏུ་སོང་བའི་ཡེ་ཤེས་དེ་ཟུང་འཇུག་ཉེར་གཅིག་པ་གཟུགས་ཅན་གཟུགས་མེད་རོ་གཅིག་གི་ཟུང་འཇུག་ཏུ་འཇོག་པའི་བར་ཡིན་པས་ཟུང་དུ་འཇུག་ཚུལ་དུ་མ་ཡོད་ལགས།
47-6-181
དེ་ལྟ་བུའི་ཟུང་འཇུག་ཐོག་མར་གང་ནས་ཐོབ་ན་རིམ་པ་བཞི་པའི་འོད་གསལ་ལས་ལངས་པ་དང་། ལུགས་ལྡོག་གི་ཉེར་ཐོབ་གྲུབ་པ་དང་། སྤངས་པ་ཟུང་འཇུག་ཐོབ་པ་དང་། ཉོན་མོངས་སྤངས་པའི་མྱང་འདས་ཐོབ་པ། རང་རྒྱུད་ལྡན་གྱི་གང་ཟག་གིས་དགྲ་བཅོམ་པ་ཐོབ་པ་རྣམས་དུས་མཉམ་པར་ཁྲིད་ཡིག་རྣམས་ལས་བཤད་ཅིང་དེ་བཞིན་དུ་མཚན་བརྗོད་ལས་ཀྱང་། འཁོར་བའི་རྒྱ་མཚོའི་ཕ་རོལ་སོན། །བྱ་བ་བྱས་པ་སྐམ་སར་གནས། །སོགས་དང་།དེ་བཞིན་དུ། སྤྱོད་བསྡུས་ལས་ཀྱང་གསུངས།ཟུང་འཇུག་སྐབས་སུ་ཇི་ལྟར་དོན་དམ་པའི་བདེན་པ་ལ་ཞུགས་ཏེ་དངོས་པོ་མེད་པར་གྱུར་ནས་ལྡང་བར་བགྱིད་ནས་ཐར་པའི་དོན་ནི་གང་ལགས་སོགས་ཀྱིས། ཟུང་འཇུག་པ་དེ་རིམ་པ་བཞི་པའི་འོད་གསལ་ལས་ལྡང་ཚུལ་དང་། ཟུང་འཇུག་པ་ཐར་པར་བགྲོད་ཚུལ་དྲིས་པའི་ལན་དུ་ཟུང་འཇུག་པ་འོད་(༥ན)གསལ་ལས་ལྡང་ཚུལ་ནི། སྤྱོད་བསྡུས་ལས། ཆུ་ལས་ཉ་ལྟ་བུ་དང་མྱུར་བར་གཉིད་ལོག་པ་ལས་སད་པ་བཞིན་དུ་སོགས་དང་། ཟུང་འཇུག་པས་མྱང་འདས་ཐོབ་ཚུལ། སྤྱོད་བསྡུས་ལས། གཟུགས་ཀྱི་བདག་ཉིད་ཅན་གྱི་མིང་ནི་རྡོ་རྗེ་འཆང་ཆེན་པོ་ཞེས་བྱའོ། །འཁོར་བའི་འཆིང་བ་ལས་གྲོལ་བའི་ཐར་པ་ཆེན་པོ་ཞེས་བྱ་བའོ། །ཞེས་དང་། དེའི་ཤེས་བྱེད་དུ་གསང་བ་གྲུབ་པ་དྲངས་གསུངས། ཞི་བའི་གོ་འཕང་བླ་ན་མེད། མཆོག་ཏུ་མྱ་ངན་འདས་པ་དེར། ནས། ཐབས་དང་ཤེས་རབ་བདག་ཉིད་ཅན།མཆེད་རྣམས་ཀུན་གྱིས་རབ་བརྒྱན་པར། །ཞེས་སོགས་གསུངས་སོ། །ཁ་སྦྱོར་ལས་རྡོ་རྗེའི་བསྒྲུབ་པ་མི་འདྲ་བ་ལྔ་གསུངས་པ་ལམ་ལྔ་ལ་སྦྱར་རྒྱུ་ཡིན་ཏེ།ཁ་སྦྱོར་ལས། རྡོ་རྗེ་སྤྲོ་བའི་སྦྱོར་བ་ཡིས། རྡོ་རྗེ་སེམས་ཅན་འཁོར་བར་སྒྲོལ། །ཞེས་པས་ཚོགས་ལམ་སྐབས་སུ་བསྐྱེད་རིམ་པས་བདེ་སྟོང་གཉིས་སུ་མེད་པའི་དོན་གྱི་རྡོ་རྗེ་དང་།དེའི་གཟུང་རྣམ་ལྷར་ཤར་བའི་སྤྲོ་བསྡུས་སེམས་ཅན་འཁོར་བ་ལས་སྒྲོལ་བའི་རྡོ་རྗེའི་བསྒྲུབ་པ་བསྟན། ཡང་ཁ་སྦྱོར་ལས། རྡོ་རྗེ་བཀུག་པའི་རྣལ་འབྱོར་དང་། །རྡོ་རྗེ་རེངས་པའི་རྣལ་
47-6-182
འབྱོར་རིགས། །ཞེས་པས་སྦྱོར་ལམ་སྐབས་སུ་རྫོགས་རིམ་པའི་བདེ་སྟོང་གཉིས་མེད་ཀྱི་དོན་གྱི་རྡོ་རྗེ་དེ་བཀུག་པ་གོམས་པར་བྱས་པས་གསལ་སྣང་ཐོབ་པའི་རྣལ་འབྱོར་དང་། བཞི་པའི་འོད་གསལ་རྡོ་རྗེ་དེ་ཐོབ་ཕྱིར་རྣམ་རྟོག་རླུང་བཅས་རེངས་(༥བ)པའི་སྦྱོར་བ་སྟེ་རྡོ་རྗེའི་བསྒྲུབ་པ་གཉིས་བྱེད་པ་དང་། ཡང་ཁ་སྦྱོར་ལས། མུན་པ་ལྟ་བུའི་ཉོན་མོངས་རྣམས། །རྣམ་པར་ཤེས་པ་དང་ལྷན་ཅིག །ཡེ་ཤེས་རྡོ་རྗེ་གཞོམ་པར་བྱ། །ཞེས་པས་བཞི་པའི་དོན་གྱི་འོད་གསལ་སྟོང་ཉིད་མངོན་སུམ་དུ་རྟོགས་པའི་ཡེ་ཤེས་ཀྱི་རྡོ་རྗེ་མར་མེ་ལྟ་བུས་ཉོན་མོངས་པའི་མུན་པ་མ་ལུས་པ་ས་བོན་དང་བཅས་པ་འཇོམས་པའི་རྡོ་རྗེའི་བསྒྲུབ་པའམ་རྣལ་འབྱོར་དང་། ཡང་ཁ་སྦྱོར་ལས། སྣང་བའི་ཕྱོགས་ནི་ཐོབ་པ་ཡིས། །རྡོ་རྗེའི་བསྒྲུབ་པ་ཐམས་ཅད་ལ། །རྡོ་རྗེའི་བདག་ཅེས་བསྟན་པ་ཡིན། །ཞེས་པས་སྟོང་ཉིད་མངོན་སུམ་དུ་རྟོགས་པའི་སྣང་བ་མཉམ་དུ་ཐོབ་པ་ནས་སྒོམ་ལམ་གྱི་གནས་སྐབས་སུ་འཇུག་པའི་ས་བཅུའི་སྐབས་སུ་སྟོང་ཉིད་མངོན་སུམ་དུ་རྟོགས་པའི་བདེ་སྟོང་ཡེ་ཤེས་ཀྱི་རྡོ་རྗེ་ཉམས་སུ་ལེན་པའི་སྒྲུབ་པ་ཐམས་ཅད་ལ་རང་རང་གི་ངོས་སྐལ་གྱི་སྒྲིབ་གཉིས་སྣང་བ་བག་ཆགས་དང་བཅས་པ་འཇོམས་པའི་བར་ཆད་མེད་ལམ་གྱི་རྡོ་རྗེ་བདག་ཉིད་ཡིན་ཞེས་བཤད་ལ། ཡང་ཁ་སྦྱོར་ལས། རྡོ་རྗེ་ཆོས་ཀྱི་སྙིང་པོ་ཅན། །རྡོ་རྗེ་ཐར་པ་ལྷུར་ལེན་པ། །ཞེས་པས་མི་སློབ་པའི་ཟུང་འཇུག་སྐབས་སུ་ཆོས་ཡུལ་སྟོང་ཉིད་དང་ཡུལ་ཅན་ལྷན་སྐྱེས་བདེ་ཆེན་གཉིས་ཆུ་ལ་ཆུ་བཞག་བཞིན་དུ་དབྱེར་མེད་པའི་རྡོ་རྗེ་དུས་ནམ་ཡང་མཉམ་གཞག་ལས་མི་བཞེངས་པའི་སྙིང་པོ་ཅན་གྱི་གཟུགས་སྐུས་སྒྲིབ་གཉིས་མ་ལུས་པ་སྤངས་པའི་བདེན་གཉིས་དབྱེར་མེད་དམ་(༦ན)མི་ཕྱེད་པའི་རྡོ་རྗེ་མི་གནས་པའི་མྱང་འདས་ཐོབ་པར་བཤད་པ་ལེགས་སོ། །ས་བཅུ་ལ་བཤད་ཚུལ་མང་ཡང་མ་སྤྲོས་སོ། །དེས་ན་འདི་ལྟ་བུའི་ངེས་དོན་འབྲས་བུའི་མཁའ་སྤྱོད་ཐོབ་པའི་སངས་རྒྱས་དང་ཕར་ཕྱིན་གྱི་ལོངས་སྐུ་ལྔ་ལྡན་དོན་མི་གཅིག་སྟེ། དེ་འདྲའི་སངས་རྒྱས་མ་ཐག་ལ་སྐུ་བཞི་ཡོད་
47-6-183
པས་སོ། །གོ་དོན་འདྲ་སྟེ། སྤངས་རྟོགས་མཐར་ཕྱིན་པར་མཚུངས་སོ། །ཕར་ཕྱིན་དང་རྒྱུད་སྡེ་འོག་མ་གསུམ་ནས་བཤད་པའི་རྒྱུན་མཐའི་ཡེ་ཤེས་དང་རྫོགས་པའི་སངས་རྒྱས་བླ་མེད་ཀྱི་ལམ་ལ་མ་ཞུགས་པར་མི་ཐོབ་སྟེ། དེ་དག་ལས་ཀྱང་སངས་རྒྱས་སྐབས་སུ་རྣམ་རྟོག་མེད་པ་དང་མཉམ་རྗེས་ངོ་བོ་གཅིག་པ་དང་། སྐུ་བེམ་པོ་མིན་པར་བཤད་པ་བཞིན་གྱི་སངས་རྒྱས་ཀྱི་དེ་ཐོབ་པ་ལྷན་སྐྱེས་ཀྱི་རླུང་ཐིག་ལ་དམིགས་དགོས་ལ། ཕར་ཕྱིན་དང་རྒྱུད་སྡེ་འོག་མར་དེ་མ་བཤད་པའི་ཕྱིར། དེས་ན་འཚང་རྒྱ་བ་དང་རྒྱུན་མཐའི་ལམ་ལ་བླ་མེད་དུ་འཇུག་དགོས་ཚུལ་དེ་ཡིན། མདོ་སྔགས་ཀྱི་ལོངས་སྤྲུལ་གོ་དོན་རགས་པ་མཚུངས་ཀྱང་ཞིབ་ཆ་ཤིན་ཏུ་མང་ཞུ། འཕྲལ་དུ་ཞུས་ལན་ཉུང་གསལ་དགེ་རྒན་གྱི་གསུང་ངག་ནས་དྲིས་པ་ལྟར་ཕུལ་བ་ལགས་ཞུ། ཉིན་མཚན་དུས་ཀུན་ཏུ་བཀྲ་ཤིས།། །།
༄། །སངས་རྒྱས་ཀྱིས་སྤྲུལ་པ་དུ་མ་སྤྲུལ་ཚེ་དེ་དག་གི་རྣམ་ཤེས་གཅིག་ཡིན་མིན་དང་། ཡོད་མེད་དང་། སྤྲུལ་ཚུལ་སྐོར།
ཁ༽ སངས་རྒྱས་ཀྱིས་སྤྲུལ་པ་དུ་མ་སྤྲུལ་ཚེ་དེ་དག་གི་རྣམ་ཤེས་གཅིག་ཡིན་མིན་དང་། ཡོད་མེད་དང་། སྤྲུལ་ཚུལ་སྐོར།༈ དུས་གསུམ་རྒྱལ་བའི་རང་གཟུགས་འཕགས་པ་ཕྱག་ན་པདྨའི་ཞབས་ཀྱི་པདྨོ་ལ་ཕྱག་འཚལ་ཞིང་སྐྱབས་སུ་མཆིའོ། །དུས་ཐམས་ཅད་དུ་རྗེས་སུ་བཟུང་དུ་གསོལ། འདིར་འཕགས་(༦)པ་ཕྱག་ན་པདྨའི་གསུང་བཀའ་སྩལ་པ་འགའི་ལན་དངོས་སུ་ཞུས་པའི་ཐོ་འགོད་པ་ཙམ་བྱས་ན་སངས་རྒྱས་ཀྱིས་སྤྲུལ་པ་དུ་མ་སྤྲུལ་ཚེ་དེ་དག་གི་རྣམ་ཤེས་གཅིག་ཡིན་མིན་དང་ཡོད་མེད་དང་སྤྲུལ་ཚུལ་གསུམ་ལས། དང་པོ་ནི། སངས་རྒྱས་བྱང་སེམས་ཀྱི་སྤྲུལ་པ་ཡིན་ཚད་ལ་རྣམ་ཤེས་ཡོད་དགོས་པའི་ངེས་པ་མེད་པ་གོང་མའི་སྐབས་བརྒྱད་པ་ལྟར་ཕྱིའི་ས་ཆུ་འགྲོ་བར་སྤྲུལ་པ་དང་། ལྷར་སྤྲུལ་པ་ལྟ་བུ་སྟེ་སྣོད་བཅུད་སྣ་ཚོགས་སུ་སྤྲུལ་པ་ཡོད་
47-6-184
ཅིང་། རྣམ་ཤེས་དང་མི་ལྡན་ཚུལ་ཡང་ཐུབ་དགོངས་ལས། དེ་ལྟར་ནི་ཐང་དང་ཆུ་དང་བར་སྣང་ལ་སྤྱོད་པའི་བརྟན་པ་དང་གཡོ་བ་རྣམས་ཇི་སྙེད་པར་སྐུ་དང་གསུང་གིས་བསྡུས་པའི་ཚེ་ན། བཅོམ་ལྡན་འདས་ཀྱི་སྤྲུལ་པ་རྣམས་ནི་སེམས་ཅན་འདུལ་བའི་ཆེད་དུ་འཇིག་རྟེན་གྱི་ཁམས་མཐའ་ཡས་པ་རྣམས་སུ་སྟེ་སྤྲུལ་པའི་སྐུ་མཐའ་ཡས་པ་དེ་རྣམས་ཀྱང་སྒྱུ་མའི་སྐྱེས་བུ་བཞིན་དུ་སེམས་ལས་བྱུང་བས་སྟོང་པའོ། །ཞེས་གསུངས། དེ་ལ་དཔྱོད་ལྡན་ཆེན་པོ་ལ་ལ་ན་རེ། ཇི་ལྟར་དེ་རྣམས་ཀྱི་སངས་རྒྱས་ཀྱི་སྐུ་དང་གསུང་སྔར་མེད་གསར་དུ་སྤྲུལ་པ་ལྟར་སེམས་སེམས་བྱུང་སྔར་མེད་གསར་དུ་ཅིའི་ཕྱིར་མི་སྤྲུལ་ཞེས་པའི་དྲི་བའམ་དོགས་པ་འཆད་པར། དེ་ཉིད་ལས། ཇི་ལྟར་དེ་རྣམས་ཀྱི་སྐུ་དང་གསུང་དག་སྤྲུལ་པ་དེ་ལྟར་སེམས་དང་སེམས་ལས་བྱུང་བ་རྣམས་ཀྱང་མི་སྤྲུལ་པ་ཅི་ཞེ་ན། ཞེས་གསུངས། ལན་དུ་སློབ་དཔོན་ཨ་བྷྱ་སོགས་ན་རེ། དེའི་རྒྱུ་མཚན་ཡོད་དེ། སེམས་སེམས་བྱུང་ཉེར་ལེན་(༧ན)མེད་པར་སྔར་མེད་གསར་དུ་མི་འབྱུང་བའི་ཕྱིར། ཞེས་པའི་དོན་ནི། དེ་ཉིད་ལས། དེའི་ཉེར་བར་ལེན་པ་མེད་པའི་ཕྱིར། སྔ་ནས་མེད་པ་མི་འབྱུང་བའི་ཕྱིར་རོ། །ཞེས་གསུངས། དེ་ལ་ཁོ་ན་རེ།སེམས་སེམས་བྱུང་སྤྲུལ་པ་ཡང་འདོད་རིགས་པ་མིན་ནམ་སྟེ་ཡིན་པར་ཐལ། ལུང་ལས།སངས་རྒྱས་རྣམས་ཀྱི་སྐུ་དང་གསུང་དང་ཐུགས་ནི་སྤྲུལ་པ་སྟེ། ཞེས་སོགས་སྐུ་གསུང་ཐུགས་གསུམ་ཀ་སྤྲུལ་པར་བཤད་པའི་ཕྱིར་ཏེ། དེ་ཉིད་ལས། འོ་ན་སེམས་དང་སེམས་ལས་བྱུང་བ་སྤྲུལ་པ་ཡང་འདོད་པ་མིན་ནམ། སངས་རྒྱས་རྣམས་ཀྱི་སྐུ་དང་གསུང་དང་ཐུགས་ནི་སྤྲུལ་པ་སྟེ། རབ་ཏུ་སྦྱོར་བའི་ཐབས་ཀྱི་ལས་ཅན་ནོ། །ཞེས་གསུངས་པའི་ཕྱིར་ཞེ་ན། ཞེས་གསུངས་པའི་ཕྱིར་རོ། །འདིས་ཤེས་བྱེད་དང་བཅས་ཏེ་བཤད་དོ། །དེ་ལ་སློབ་དཔོན་སོགས་ན་རེ། དེ་ལྟར་སྐུ་གསུང་ཐུགས་སྤྲུལ་པར་བཤད་པ་དང་།དེ་ལྟར་འདོད་དགོས་པ་བདེན་མོད་ཀྱང་སྔར་མེད་གསར་དུ་ཐུགས་སྤྲུལ་པ་མི་འདོད་པའི་ཁྱད་པར་འཐད་པ་ཡིན་ཞེས་པའི་ལན་བཤད་པར། དེ་ཉིད་ལས། བདེན་ཏེ་འདོད་མོད་ཅེས་
47-6-185
གསུངས། འོན་ཀྱང་དེ་ལྟར་ན་ཡང་སྐུ་དང་གསུང་སྤྲུལ་ཚུལ་ལྷའི་བྱིན་རླབས་ཀྱིས་རྨི་ལམ་མཐོང་བ་དང་། བརྗོད་པའི་ངག་གི་དོན་རྟོགས་པར་བྱེད་པ་སོགས་དུ་མས་བཤད་ལ་སློབ་དཔོན་ལེགས་ལྡན་ཡང་འདི་དང་འདྲ་ཚུལ་ནི། དབུ་མ་སྙིང་པོའི་འགྲེལ་པ་ལས། དེ་ཉིད་ན་བཞུགས་བཞིན་དུ་འཛམ་བུའི་གླིང་བྱེ་བ་ཕྲག་བརྒྱ་དག་ཏུ། དགའ་ལྡན་གྱི་ཕོ་བྲང་ན་བཞུགས་པ་ཐོག་མར་(༧བ)མཛད་དེ། འཕོ་བ་དང་། ཞེས་པ་ནས། སྤྲུལ་པ་གང་གིས་སེམས་ཅན་ཚེ་རབས་གཞན་དག་ཏུ་དད་པ་ལ་སོགས་པའི་དགེ་བའི་རྩ་བ་རྒྱ་ཆེན་པོ་ཉེ་བར་བསགས་པས་ཉེ་བར་བསྟན་པ། རྒྱུད་ཡོངས་སུ་སྨིན་པ་སྐལ་པ་དང་ལྡན་པ་རྣམས་ཀྱི་བློའི་པདྨོ་ཁ་འབྱེད་པར་མཛད་པའི་ཕྱིར་སངས་རྒྱས་ཞེས་བྱ་སྟེ། ཞེས་གསུངས་ལ། དེའི་ཤེས་བྱེད་དུ་སློབ་དཔོན་འཕགས་པའི་ལུང་དྲངས་ཀྱང་། སྔོན་གྱི་སྨོན་ལམ་གྱི་ཤུགས་ཀྱི་དབང་གིས་སྤྲུལ་པའི་སྐུས་ཐམས་ཅད་ལ་ཕན་འདོགས་པར་བཟོད་པ་འཛམ་བུའི་གླིང་བྱེ་བ་ཕྲག་བརྒྱ་དག་ཏུ་དགའ་ལྡན་གྱི་ཕོ་བྲང་ན་བཞུགས་པ་ཐོག་མར་མཛད་དེ། ཞེས་པ་ནས། ལུས་དང་ངག་དང་སེམས་གནས་སུ་གྱུར་པའི་ངོ་བོ་ཉིད་ཡིན་ནོ་ཞེས་བཤད་དེ་ཞེས་གསུངས་ལ། དེ་བཞིན་དུ་ཇོ་བོ་རྗེ་ཡབ་སྲས་ཀྱི་གསང་བའི་མཛོད་སྤྲུལ་པའི་གླེགས་བམ་རིན་པོ་ཆེའི་གསུང་ངོ་མཚར་བ་གསུངས་མོད་མང་དོགས་ལ། དེ་བཞིན་དུ་དྲི་མ་མེད་པར་གྲགས་པས་ཞུས་པ་ལས་ཀྱང་། ཟླ་བའམ་ཉི་མར་དེ་འགྱུར་ཏེ། བརྒྱ་བྱིན་ཚངས་པ་སྐྱེ་དགུ་དབང་། །ཆུ་དང་མེར་ཡང་རབ་འགྱུར་ཏེ། །ས་དང་རླུང་དུའང་དེ་བཞིན་ནོ། །ཞེས་སོགས་བརྟན་གཡོ་སྣ་ཚོགས་སུ་སྤྲུལ་ཚུལ་དང་། དེ་བཞིན་དུ་དཀོན་མཆོག་ཏཱ་ལ་སོགས་དུ་མས་བཤད་ལ། ལས་སྟོབས་ཀྱིས་སྤྲུལ་པ་དུ་མ་སྟོན་པ་ནི་བརྒྱ་བྱིན་དང་ལྷ་ཁྱབ་འཇུག་སོགས་ཀྱི་རྫུ་འཕྲུལ་ལྟ་བུ་དང་།སྔགས་ཀྱི་མཐུས་སྟོན་པ་མ་མོ་དང་གཤིན་རྗེ་དང་རིགས་འཛིན་གྱི་ལྷའི་(༨ན)རྫུ་འཕྲུལ་ལྟ་བུ་དང་། སྨོན་ལམ་གྱི་སྟོབས་ཀྱིས་རྒྱལ་སྲས་རྣམས་ཀྱི་སྐྱེས་ཙམ་ནས་ཐོབ་པའི་རྫུ་འཕྲུལ་དང་སྤྲུལ་པ་ལྟ་བུ་དང་། ཏིང་ངེ་འཛིན་གྱི་ནུས་པས་སྤྲུལ་པ་མདོ་ལས་བཤད་པའི་ཕྱི་ནང་གི་རྣལ་
47-6-186
འབྱོར་པས་རྫུ་འཕྲུལ་ཡ་མ་ཟུང་བརྒྱད་སོགས་ལྟ་བུ་མང་ལ། དེའི་རྒྱུ་མཚན་གྱིས་སྤྲུལ་པ་དུ་མ་ཤེས་ལ། རྣམ་ཤེས་ཡོད་མེད་དང་སྤྲུལ་ཚུལ་གསུམ་ཀ་དེས་ལེགས་པར་རྟོགས་སླ།ཡང་འཁོར་བ་ལ་ཐོག་མཐའ་མེད་ཀྱང་ཐ་མའི་མཐའ་ཡོད་ཅིང་། ཀུན་རྫོབ་ཏུ་ཡང་མཐའ་མེད་པར་བཤད་པ་སེམས་ཅན་ལམ་མ་ཞུགས་རང་དགའ་བའི་བསམ་ངོ་ལ་ལྟོས་ཏེ་མཐའ་འདི་ཙམ་ཞེས་ངོས་བཟུང་མེད་པར་དགོངས་པ་ལགས། འཕགས་ཡུལ་རང་དུའང་འཁོར་མཐའ་མེད་པ་དང་འཁོར་བ་བྲི་གང་མེད་པར་འདོད་པ་དང་། སློབ་དཔོན་སེང་བཟང་སོགས་ཀྱིས་དེ་མི་འདོད་པའི་ལུགས་གཉིས་ལས་ད་ལྟ་ཕྱི་མ་འཐད་པར་མཛད་ཅིང་དོན་ལ་གནས།འདིར་ས་བོན་ཅན་ཐོག་མ་མེད་པའི་ས་བོན་ཅན་ལ་དུ་མ་དང་། གཙོ་བོ་འགྲོ་བའི་སེམས་ཀྱི་ཁམས་ལ་ལྟོས་ཚུལ་གཅིག་དང་། ཡང་བྱ་དང་སྒོ་ངའི་དཔེ་ལྟར་ས་མྱུག་གི་དཔེ་གཅིག་ཀྱང་ཤེས་དགོས། བྲི་གང་མེད་ཚུལ་ནམ་མཁའི་ཤར་ལྟ་བུ་སྐུའི་རྒྱ་དང་ནམ་མཁའ་མཉམ་པར་འདོད་ལ། བྲི་བར་འདོད་པས། དེ་གཉིས་ཐུག་མེད་མཚུངས་ཀྱང་ཕྱོགས་གཞན་ལ་དེ་འདྲ་མཐའ་ཡས་པས་རྒྱ་ཆེ་ཆུང་མངོན་སུམ་ཡིན་པར་བཞེད་དེ། སེམས(༨བ)་ཀྱི་རང་བཞིན་འོད་གསལ་དང་དྲི་མ་གློ་བུར་བའི་ཚུལ། ཐེག་བསྡུས་ལས། ཆུ་ཁམས་གསེར་དང་ནམ་མཁའ་བཞིན། །དག་པ་བཞིན་དུ་དག་པར་འདོད། ཅེས་གསུངས་པའི་ཕྱིར། ལེགས་ལྡན་དང་ཟླ་བས་ཆོས་དབྱིངས་ལ་དེ་འདྲའི་བསླད་པ་མི་རུང་ཚུལ། འཇུག་པར། རབ་རིབ་མཐུ་ཡིས་སོགས་ལྟར་བཤད། རྒྱུད་བླ་མ་ལས་ཀྱང་།འགྲོ་བ་ཞི་བའི་ཆོས་ཉིད་དུ། །རྟོགས་ཕྱིར་ཇི་ལྟ་ཉིད་དེ་ཡང་། །རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཞེས་དང་། དེའི་ཐོགས་འགྲེལ་ལས་ཀྱང་། མདོར་ན་རྒྱུ་གཉིས་ལས་སྐྱེས་ཏེ། སེམས་
47-6-187
རང་བཞིན་གྱིས་འོད་གསལ་བའི་ཕྱིར་དང་། དེའི་ཉེ་བའི་ཉོན་མོངས་པ་གདོད་ནས་ཟད་ལ་འགག་པར་མཐོང་བའི་ཕྱིར་རོ། །ཞེས་འབྱུང་ལ། དེ་ལྟ་བུའི་རང་བཞིན་གྱི་རིགས་རྟོགས་པ་ལ། རྒྱུད་བླ་མ་ལས། རྒྱལ་སྲས་འགྱུར་མེད་ཆོས་ཉིད་འདི། །རྟོགས་ནས་མ་རིག་ལྡོངས་རྣམས་ཀྱིས། །སྐྱེ་བ་ལ་སོགས་དག་ཏུ་ནི། །མཐོང་བ་གང་ཡིན་དེ་རྨད་དོ། །ཞེས་གསུངས་པའི་ཕྱིར། དཔལ་ལྡན་ཁྱབ་བདག་ཆེན་པོ་རྒྱལ་བའི་དབང་པོ་མཉེས་པའི་རོལ་མོར་གྱུར།མངྒ་ལཾ།། །།


